©Getty Images/IAAF

ዶሃ – ኳታር – መስከረም 19/2012 ዓ.ም – አመቱን በሙሉ በጉዳት ያለ ውድድር በማሳለፉ ምክንያት፡ የማሸነፉ ቅድመ ግምት እምብዛም ያልተሰጠው ያለፈው ውድድር የርቀቱ ሻምፒዮን ሙክታር እድሪስ፡ ኢትዮጵያውያን የበላይ እንደሚሆኑበት አስቀድሞ የተገመተውን የ5000ሜ ውድድር በማሸነፍ፡ በዶሃው የአለም ሻምፒዮና የመጀመሪያውን የወርቅ ሜዳሊያ ለሀገሩ አስገኝቷል፡፡

ተፎካካሪዎቻቸውን እንደከዚህ ቀደሙ በውድድሩ መጨረሻ አካባቢ ሳይሆን፡ በጊዜ ለመቀነስ የተጠና የቡድን ስራ በሚመስል መልኩ እየተፈራረቁ ገና ከጅምሩ ዙሩን በማክረር ውድድራቸውን ያካሄዱት ኢትዮጵያውያን አትሌቶች፤ የመጨረሻውን መስመር ቀድሞ ለማለፍ ባደረጉት እልህ አስጨራሽ የርስበእርስ ፉክክር፡ ሙክታር እድሪስ 12፡58.85 በመግባት ሲያሸንፍ፣ ከውድድሩ መጀመር አስቀድሞ ሰፊ የማሸነፍ እድል ሊኖረው እንደሚችል የተገመተው ወጣቱ አትሌት ሰለሞን ባረጋ በበኩሉ 12፡59.70 በሆነ ሰዓት ውድድሩን በማጠናቀቅ የሻምፒዮናውን ሁለተኛ የብር ሚዳሊያ ለሀገሩ አሸነፏል፡፡

©Haileegziabher Adhanom

የአመቱ የርቀቱ የአለም ፈጣን ሰዓት ባለቤት እና ሌላው ተስፋ የሚጣልበት አትሌት ጥላሁን ሀይሌ 13፡01.11 በመግባት ካናዳዊው አህመድ ሞሃመድን ተከትሎ በአራተኛ ደረጃነት ውድድሩን ሊያጠናቀቅ ችላል፡፡

አትሌት ሙክታር እድሪስ ከውድድሩ በኋላ “እስከዛሬዋ እለት ድረስ ሙሉ በሙሉ ጤነኛ አይለሁም፡ ዛሬ እንኳን ህክምና አድርጊያለሁ፡፡ ወደ ውድድሩ የገባሁት ጓደኞቸን ለማገዝ ነበር ለዛው ነው መጀመሪያ አካበቢ ወደ ፊት የመጣሁት ነገር ግን በዛው ፍጥነት ለመቀጠል አልቻልኩም ነበር፡፡

ወደ ውድድሩ መጠናቀቂያ አካባቢ ላይ ግን ኖርወያዊው አትሌት ጃኮብ እየገሰገሰ እንደሆነ ሲሲማኝ እና አመቱን ሙሉ የለፋንበት እና ብዙ ተስፋ ያደረግንበትን ውድድር እንዳንሸነፍ በማለት ያለኝን ሀይል በሙሉ ተጠቅሜ በመሮጥ ለማሸነፍ ችያለሁ፡፡” ሲል በተለይም ለልዩ ስፖርት አሰተያዬቱን ሰጥቷል፡፡

በእለቱ በተካሄደው የሴቶች 3000ሜ መሰናክል የፍጻሜ ውድድር የተሳተፈችው ኢትዮጵያዊቷ አትሌት መቅደስ አበበ 9፡25.66 የሆነ የራሷን ምርጥ ሰዓት ባስመዘገበችበት ውድድር 11ኛ ሆና አጠናቃለች፡፡ ኬንያዊቷ ቢያትሬስ ቼፕኮኤች የሻምፒዮናው ክብረወሰን በሆነ ሰዓት (8፡57.84) በመግባት የወርቅ ሜዳሊያ ስታሸንፍ፡ አሜሪካዊቷ ኤማ ኮበርን እና ጀርመናዊቷ ጌሳ ክራውስ የብር እና ነሀስ ሜዳሊያዎቹን አሸንፈዋል፡፡

©Getty Images/IAAF

ዕለት አምስት – መስከረም 20/2012ዓ.ም

3000ሜ መሰናክል ወንዶች ማጣሪያ

ተሳታፊዎች – ጌትነት ዋሌ፣ ጫላ ባዮ፣ ለሜቻ ግርማ እና ታከለ ንጋቴ

ሰዓት – ምሽት 12፡15

የ2019 ዲያመንድ ሊጉ አሸናፊ ጌትነት ዋሌ እና ሌሎችም በጥሩ አቋም ላይ የሚገኙ አትሌቶችን የያዘው የወንዶች የመሰናክል ቡድን፡ ኢትዮጵያን ለሌላ ድል ለማብቃት የሚያደርገውን የግማሽ ፍጻሜ የማጣሪያ ውድደር ዛሬ የሚያካሂድ ይሆናል፡፡

author image

About Haileegziabher Adhanom

Sports Writer & Managing Editor

You Might Also Like...

Leave a Reply

Your email address will not be published. Required fields are marked *