Gudaf Tsegay – Photo ISAKOVIC/AFP via Getty Images

ኦሪገን ሀምሌ 16/2014ዓ.ም – አትሌት ጉዳፍ ጸጋይ በ5000ሜ ሴቶች የወርቅ ሜዳሊያ አሸነፈች፡፡ ጉዳፍ ውድድሩን 14፡46.29 በሆነ ውጤት ስታሸንፍ ሌላኛዋ የሀገሯ ልጅ ዳዊት ስዩም14፡47.75 በመግባት የነሀስ ሜዳሊያ አምጥታለች፡፡ ኬንያዊቷ ቢያትሪስ ቺቤት በ14፡46.75 የብር ሜዳሊያ ባለቤት ሆናለች፡፡ ለኢትዮጵያውያን ውጤታማነት አስደናቂ አስተዋጽኦ የነበራት ለተሰነበት ግደይ ውድድሯን በአምስተኛነት ፈጽማለች፡፡

ይህንን የጉዳፍን ድል ተከትሎ የኦሬገኑ የአለም አትሌቲክስ ሻምፒዮና፡ ኢትዮጵያ በውድድሩ ታሪክ ከፍተኛውን ውጤት ያስመዘገበችበት ሻምፒዮና ሆኖ ተመዝግቧል፡፡

ኢትዮጵያ ከዚህ ቀደም በተሳተፈችባቸው 17 የአለም ሻምፒዮናዎች፡ በአንድ ውድድር ከሶስት በላይ የወርቅ ሜዳሊያዎችን አሸንፋ አታውቅም፡፡ እስከዛሬ በተሳተፈችባቸው ውድድሮች ያገኘችው ከፍተኛ የሚዳሊያ ብዛት ሶሰት ሲሆን እሱንም ለአምስት ጊዜያት ያክል አሳክታዋለች፡፡ የኢትዮጵያ ከፍተኛ ውጤት የተመዘገበበት ውድድር እኤአ 2005 ሔልሲንኪ ላይ የተካሄደው ሻምፒዮና ሲሆን በወቅቱ 3 ወርቅ፣ 4 ብር እና ሁለት የነሀስ ሜዳሊያ ተገኝቶ ነበር፡፡

ኢትዮጵያ ነገ በሚጠናቀቀው 18ኛው የአለም ሻምፒዮና ቀሪ ውድድሮች እያሏት: በአራት ወርቅ አራት ብር እና ሁለት ነሀስ ከአለም ሁለተኛ ከአፍሪካ ደግሞ በቀዳሚነት እየመራች ትገኛለች።

በዚህ ውድድር ላይ ኢትዮጵያን ወክለው የቀረቡት የአለም የርቀቱ የክብረወሰን ባለቤት እና የ10000ሜ የአለም ሻምፒዮኗ ለተሰንበት ግደይ እና የአለም የ1500ሜ የብር ሜዳሊያ አሸናፊዋ ጉዳፍ ጸጋይ ከሀገራቸው ልጅ ዳዊት ስዩም ጋር በሚገርም የቡድን ስራ እና መናበብ፡ እየተቀያየሩ ዙሩን ሲመሩ ቆይተው በመጨረሻም ወርቅ እና ነሀስ ሜዳሊያን ለማሸነፍ በቅተዋል፡፡

በዚህ ውድድር ላይ ተሳተፉት ሶስቱም አትሌቶች ማጣሪያውን ያለፉበት መንገድ አስተማማኝ የሚባል ነው፡፡ ለውድድሩ ያላቸው ዝግጅት እና ዝግጁነትም የአሰልጣኞቹን ልብ የሚሞላ ነበር፡፡ እዚህ ኦሬገን የሚገኘው የኢትዮጵያ ልኡክ ቡድንም ስኬታማ የሚባለውን የእስካሁን ቆይታውን ታሪካዊ ለማድረግ የምጥ በሚመስል የጉጉት እና የጭንቀት ስሜት ውስጥ ሆኖ ውድድሩን ተመለክቷል፡፡

ከዚህ ጉጉት እና ተስፋ ፊት ቆመው የነበሩት ትውልደ ኢትዮጵያቷ፡ ሆላንዳዊት የኦሊምፒክ አሸናፊ ሲፈን ሀሰን፣ ኬንያውኑ ቤያትሪስ ቺቤት፣ ግሎሪያ ካይት እና ማርጋሬት ቸሊሞ፣ እንግሊዛዊቷ ኤሊሽ ማክኮልጋን የመሳሰሉ አትሌቶች የሚችሉትን ያክል ቢጥሩም የታለመውን እውን ከመሆን ሊያስጥሉት ግን አልቻሉም፡፡

author image

About Haileegziabher Adhanom

Sports Writer & Managing Editor

You Might Also Like...

Leave a Reply

Your email address will not be published. Required fields are marked *